மத்திய கிழக்கில் தொடர்ந்து அதிகரித்து வரும் பதற்றம், ஈரானின் ஏவுகணை மற்றும் ட்ரோன் திறன், அமெரிக்காவின் மாறிவரும் வெளிநாட்டு கொள்கை ஆகியவற்றை கருத்தில் கொண்டு, தனது தேசிய பாதுகாப்பு கொள்கையில் முக்கிய மாற்றங்களை மேற்கொள்ள சவூதி அரேபியா முடிவு செய்துள்ளது.
அமெரிக்காவை மட்டுமே பாதுகாப்பு கூட்டாளியாக நம்பும் பழைய அணுகுமுறையிலிருந்து விலகி, பல நாடுகளுடன் பாதுகாப்பு ஒத்துழைப்பை விரிவுபடுத்தும் திட்டத்தில் ரியாத் தீவிரம் காட்டி வருகிறது. இதன் மூலம் பாதுகாப்பு துறையில் தன்னிறைவு பெறுவதும், வெளிநாட்டு சார்பைக் குறைப்பதும் முக்கிய இலக்காகக் கருதப்படுகிறது.
பாதுகாப்பு கூட்டணியில் மாற்றம்
சமீப ஆண்டுகளில் அமெரிக்கா, மத்திய கிழக்கு பிராந்தியத்தில் தனது நேரடி ராணுவ ஈடுபாட்டை படிப்படியாகக் குறைத்து வருகிறது. இந்த சூழலில், சவூதி அரேபியா தனது பாதுகாப்பு தேவைகளை புதிய கோணத்தில் அணுகத் தொடங்கியுள்ளது.
இதற்காக ஐரோப்பிய நாடுகள், ஆசிய கூட்டாளிகள் மற்றும் உள்நாட்டு பாதுகாப்பு தொழில்துறையுடன் இணைந்து புதிய தொழில்நுட்பங்கள், ஏவுகணை தடுப்பு அமைப்புகள் மற்றும் நவீன ஆயுத உற்பத்தியில் முதலீடுகளை அதிகரிக்கத் திட்டமிட்டுள்ளது.
ஈரானின் வளர்ந்து வரும் சவால்
ஈரானின் ஏவுகணை திறன், ட்ரோன் தாக்குதல்கள் மற்றும் பிராந்தியத்தில் செயல்படும் அதன் ஆதரவு ஆயுதக் குழுக்கள் ஆகியவை சவூதி அரேபியாவின் பாதுகாப்பு கவலைகளில் முக்கிய இடம் பிடித்துள்ளன. இதனால், எல்லைப் பாதுகாப்பு மற்றும் வான்வழி பாதுகாப்பு அமைப்புகளை மேலும் வலுப்படுத்தும் நடவடிக்கைகளில் அந்த நாடு கவனம் செலுத்தி வருகிறது.
தன்னிறைவு நோக்கில் சவூதி
‘விஷன் 2030’ திட்டத்தின் ஒரு பகுதியாக, பாதுகாப்பு உபகருட்கள் மற்றும் ராணுவ தொழில்நுட்ப உற்பத்தியை உள்நாட்டிலேயே அதிகரிக்க சவூதி அரசு நடவடிக்கை எடுத்து வருகிறது. வெளிநாட்டு நிறுவனங்களுடன் கூட்டு உற்பத்தி, தொழில்நுட்ப பரிமாற்றம் மற்றும் பாதுகாப்புத் துறையில் முதலீடு ஆகியவற்றுக்கும் முன்னுரிமை வழங்கப்படுகிறது.
இந்த மாற்றங்கள், மத்திய கிழக்கின் பாதுகாப்பு சமநிலையிலும், ஈரானுடன் நிலவும் போட்டியிலும் புதிய திருப்பத்தை ஏற்படுத்தும் என சர்வதேச அரசியல் நிபுணர்கள் மதிப்பிடுகின்றனர்.
