2014-ஆம் ஆண்டு மத்திய அளவில் பாஜக தலைமையிலான அரசு பொறுப்பேற்ற பிறகு, கல்வித் துறையில் மீண்டும் அமைச்சர் மாற்றம் நடைபெற்றுள்ளது. கடந்த 12 ஆண்டுகளில் இது நான்காவது முறை கல்வி அமைச்சரின் பொறுப்பில் மாற்றம் ஏற்பட்டிருப்பது அரசியல் வட்டாரத்தில் கவனத்தை ஈர்த்துள்ளது. தேசிய கல்விக் கொள்கை, நுழைவுத் தேர்வுகள், உயர்கல்வி சீர்திருத்தங்கள் உள்ளிட்ட முக்கியமான காலகட்டங்களில் இந்த மாற்றம் நிகழ்ந்துள்ளது.
கல்வி அமைச்சகம் என்பது பள்ளிக் கல்வி முதல் உயர்கல்வி, ஆராய்ச்சி, தொழில்நுட்பக் கல்வி வரை நாட்டின் எதிர்காலத்தை வடிவமைக்கும் முக்கிய துறையாகக் கருதப்படுகிறது. இப்போது 5-வது கல்வி அமைச்சராக பிரகலாத் ஜோஷி பொறுப்பேற்று உள்ளார். அந்த வகையில், புதிய அமைச்சரின் நியமனம் கல்வி தொடர்பான திட்டங்கள் மற்றும் கொள்கைகளில் எந்த வகையான அணுகுமுறையை உருவாக்கும் என்ற எதிர்பார்ப்பு எழுந்துள்ளது.
கடந்த சில ஆண்டுகளாக தேசிய அளவில் கல்வி தொடர்பான பல்வேறு விவகாரங்கள் அரசியல் மற்றும் சமூக ரீதியாக விவாதங்களை ஏற்படுத்தியுள்ளன. குறிப்பாக நுழைவுத் தேர்வுகள், பாடத்திட்ட மாற்றங்கள், புதிய கல்விக் கொள்கையின் அமலாக்கம் போன்றவை தொடர்ந்து பேசப்பட்டு வரும் நிலையில், அமைச்சரின் மாற்றம் மேலும் முக்கியத்துவம் பெற்றுள்ளது.
புதிய கல்வி அமைச்சர் பொறுப்பேற்ற பிறகு, மாணவர்கள், ஆசிரியர்கள் மற்றும் கல்வியாளர்களின் எதிர்பார்ப்புகளை எவ்வாறு பூர்த்தி செய்கிறார் என்பதிலேயே அடுத்தகட்ட நடவடிக்கைகள் அமையும். கல்வித் துறையில் நிலுவையில் உள்ள சவால்களுக்கு தீர்வு காண்பதோடு, தரமான மற்றும் அனைவரையும் உள்ளடக்கிய கல்வி அமைப்பை உருவாக்கும் முயற்சிகளிலும் புதிய தலைமையின் செயல்பாடு முக்கிய பங்கு வகிக்கும்.
