தளபதி விஜய் நடிக்கும் ‘ஜனநாயகன்’ திரைப்படம் தற்போது தமிழ் சினிமா ரசிகர்களிடையே பெரும் எதிர்பார்ப்பை உருவாக்கியுள்ளது. விஜய், இந்தப் படத்தைத் தொடர்ந்து முழுமையாக அரசியலுக்கு செல்கிறாரா என்பது பெரிய கேள்வியாக உள்ளது. இப்படம் அவரது கடைசி திரைப்படமாக இருக்கலாம் என்ற தகவல்கள் இணையத்தில் வைரலாக பரவி வருகின்றன. இப்படத்தை இயக்குநர் எச். வினோத் இயக்குகிறார். அனிருத் இசையமைப்பில் உருவாகும் இப்படத்தில் பூஜா ஹெக்டே, பிரியாமணி, பாபி தியோல், மமிதா பைஜூ, பிரகாஷ் ராஜ் உள்ளிட்டோர் முக்கிய கதாப்பாத்திரங்களில் நடிக்கின்றனர்.
ஜனநாயகன் படத்தின் முதல் கிலிம்ப்ஸ் ‘The First Roar’ எனும் பெயரில் ஜூன் 22 அன்று வெளியானது. இது யூடியூபில் 32 மில்லியன் பார்வைகளை பெற்றது. இது கோலிவுட் சாதனையாகும். படம் ஜனவரி 9, 2026 அன்று பொங்கல் பண்டிகையை முன்னிட்டு வெளியிட திட்டமிடப்பட்டுள்ளது. முதலில் அக்டோபர் 2025 என்றிருந்த வெளியீட்டு திட்டம் மாற்றப்பட்டு, பொங்கல் ரிலீஸாகவும் உருவாகியுள்ளது.
படத்தின் பட்ஜெட் சுமார் ₹300 கோடி ஆகும். விஜய் இந்தப் படத்திற்காக மட்டும் ₹275 கோடி வரை சம்பளம் பெற்றதாகவும் செய்திகள் வெளியாகி உள்ளன. இப்படத்தின் டிஜிட்டல் உரிமைகள் Amazon Prime-க்கு விற்கப்பட்டுள்ளன. ஒளிபரப்புரிமை Sun TV-க்கு ஒப்பந்தமாகியுள்ளது. விஜய், எந்த அரசியல் தொடர்புடைய நிறுவனங்களுக்கும் விநியோக உரிமையை வழங்கக் கூடாது என கேட்டுக் கொண்டதாக தகவல்கள் வெளியாகியுள்ளன.
ஜனநாயகன் படத்தில் விஜய் ‘தளபதி வெற்றி (TVK)’ என்ற அரசியல் பாத்திரத்தில் நடித்துள்ளார். இது அவரது அரசியல் நிலைப்பாட்டை வெளிப்படுத்தும் வகையில் அமைந்துள்ளதென கூறப்படுகிறது. இதன் மூலம் விஜய் தனது அரசியல் பயணத்தையும் ஆரம்பிக்கப்போகிறாரா என்ற எதிர்பார்ப்பு ரசிகர்களிடையே உருவாகியுள்ளது.
